Gündəlik su rejimi: Hər yaş üçün tövsiyələr, faydalar və risklər

Sağlam həyat tərzi üçün gündəlik kifayət qədər su içmək həyati əhəmiyyət daşıyır. Su yalnız susuzluğu aradan qaldırmır, həm də bədənimizin bütün əsas funksiyalarını optimal şəkildə icra etməsinə yardım edir. Lakin hər yaş qrupunun su tələbatı fərqlidir və çox və ya az su içmək sağlamlıq problemlərinə yol aça bilər.

32gun.az  bu barədə qısa arşadırma aparıb: 

Yaşa görə su tələbatı
Uşaqlar (1-3 yaş) üçün gündə təxminən 1,3 litr su içmək məsləhət görülür, 4-8 yaş arası uşaqlar isə 1,7 litr qəbul etməlidir. Yeniyetmələrdə qızlar gündə 2 litr, oğlanlar 2,4 litr su içməlidir. Gənclər və böyüklər üçün isə qızlar 2,2 litr, oğlanlar 2,7-3 litr qəbul etməlidir. Fiziki fəaliyyətin artması ilə bu həcm 0,5-1 litr artırıla bilər. Yaşlılarda isə gündə 1,8-2,5 litr su tövsiyə olunur, çünki onların susuzluq hissi zəifləyə bilər.

Su içməyin faydaları - Xeyirli və riskli tərəfləri
Kifayət qədər su içmək bədən temperaturunun tənzimlənməsinə kömək edir, hüceyrələrin düzgün fəaliyyətini təmin edir, dərini nəmləndirir və elastikliyini qoruyur, həzmi asanlaşdırır və qəbizliyin qarşısını alır. Su enerji səviyyəsini artırır, toksinlərin atılmasını təmin edir, böyrək və sidik yollarının sağlamlığını qoruyur və beyin funksiyalarını dəstəkləyir.
Su həm də diqqətli içilməlidir. Həddindən artıq su qəbulu hiponatremiya, yəni natrium balansının pozulmasına səbəb ola bilər. Böyrək və ürək xəstəlikləri olanlarda çox su içmək təhlükəli ola bilər. Su sürətlə içildikdə isə mədə-bağırsaq narahatlığı və qusma baş verə bilər. Lakin balanslı və ehtiyac səviyyəsində su içmək sağlamlığı gücləndirir və bədənin optimal fəaliyyətinə dəstək verir.

Dietoloqdan məsləhət...
Dietoloq və sağlam həyat tərzi üzrə ekspert Leyla Mahmudcanova 32gun.az-a bildirir ki, su bədənimizin əsas komponentidir və kifayət qədər istehlakı sağlamlığın qorunmasında vacibdir. O əlavə edir ki, insanlar bəzən ya kifayət qədər su içmir, ya da həddindən artıq qəbul edir. Tövsiyəm odur ki, gündəlik su rejimi bədən çəkinizə, fiziki fəaliyyətinizə və ətraf mühit şəraitinə uyğun tənzimlənsin. Yaşlılarda susuzluq hissi zəifləyə bilər, buna görə onların içmə rejimi planlı şəkildə qurulmalıdır.

Nəticələr onu göstərir ki...
Ümumiyyətlə, gündə 1,5-3 litr su içmək yetərlidir və su bədən funksiyalarını optimallaşdırır, enerji səviyyəsini yüksəldir, dərini sağlam saxlayır və toksinlərin atılmasına yardım edir. Həddindən artıq və ya az su qəbulundan qaçınmaq, xüsusilə böyrək və ürək xəstəlikləri olan şəxslərin həkim məsləhəti ilə su rejimini tənzimləməsi vacibdir. Gündəlik su rejimini balanslı qidalanma və fiziki aktivliklə birləşdirmək sağlam həyat tərzinin əsas şərtlərindəndir.

Nilay Özsöz